Ürəyim partlayır bu səhər, Allah,

Ömür parça-parça, gün pərən-pərən,

Qırxı yola saldım birtəhər, Allah,

Yetkinlik yaşıma nə qaldı, görən?!

Göylərin min cürə möcüzəsi var,

Sən demə, bu yağış havası imiş,

Daraşdı köksümə söz-qarışqalar,

Ürəyim qarışqa yuvası imiş.

Gündüzün ovcundan düşdüm gecəyə,

Yuxu əl uzadıb açdı düyməmi,

Yorğunluq üstümdə dil deyə-deyə

Tabut çarpayıya uzatdı məni.

Bir dəqiqə sükut... bu matəm günü,

Qəhərdən boğulaq, gözümüz dolsun,

Qoy hər kəs yad etsin öz ölüsünü,

Hərə öz dərdinə başdaşı olsun.

Atıldım qoynuna imtahanların,

Əsgər şinelimi gəlmişəm geyəm,

Anamı-bacımı qoruyanların,

Ana-bacısının keşiyindəyəm.

İki min illiyin qovuşuğudur,

Gör bir nələr gəlir ağlıma, Tanrım,

Məndən təhvil alıb cavanlığımı,

Təslim eyləyirsən oğluma, Tanrım.

Fikirdən-xəyaldan gəlirəm cana,

Alanda əlimə əmək haqqımı,

Geyinmək bir yana, gəzmək bir yana,

O ki heç ödəmir yemək haqqımı.

Çapanda dördnala qaçırsa - atdı,

Dırnağından alov saçırsa - atdı,

Düşmənin üstünə uçursa - atdı,

Atdı ruhumuzun elə bir tayı,

Atlılar, atları cidarlamayın!