Bir dəqiqə sükut... bu matəm günü, Qəhərdən boğulaq, gözümüz dolsun, Qoy hər kəs yad etsin öz ölüsünü, Hərə öz dərdinə başdaşı olsun.
Dağların dumanı qəlblərə çöksün, Hamı sükut etsin bir nəfər kimi, Hamı yetim-yetim boynunu büksün, Dərsini bilməyən şagirdlər kimi.
Süzülsün gözlərdən yaş narın-narın, Torpaq udmayanı qəm kədər udsun, Zamanın nəbzini tutmayanların Zaman özü gəlib nəbzini tutsun.
Elə könülləri anaq ki bu gün, Qara buludları qar, dolu tökər, Oğlunu itirmiş analar üçün Bir dəqiqə sükut bir ömür çəkər.
Bir dəqiqə sükut... ayağa qalx sən, Qapıl yaddaşına, gözlərini yum. Bir dəqiqə sükut edə bilməyən Bir millət ömürlük sükuta məhkum.
|
