Çapanda dördnala qaçırsa - atdı, Dırnağından alov saçırsa - atdı, Düşmənin üstünə uçursa - atdı, Atdı ruhumuzun elə bir tayı, Atlılar, atları cidarlamayın!
Ruhun qanadı var, qanadın ruhu, Yatıb içinizdə, oyadın ruhu. Sizi qarğımazmı Qıratın ruhu, Nəyə əminsiniz, kimə arxayın, Atlılar, atları cidarlamayın!
Göydən başımıza daş tökər Allah, Qırılıb gedərik, qəbir yetişməz, Cidarlı atların belində, vallah, Koroğlu yetişməz, Nəbi yetişməz, Atlılar, atları cidarlamayın!
Neçə yurd dağıldı, neçə düşərgə, Qeyrət aləmində fərqə bax, fərqə, Atlar qərbə çəkir, atlılar şərqə, Nədən silkələmir sizi harayım, Atlılar, atları cidarlamayın!
Orda Xaçın qalıb, Həkəri qalıb, Fırlanmır, qeyrətin təkəri qalıb, Hələ ki, dizində təpəri qalıb- Dağlara dağıdın, düzlərə yayın, Atlılar, atları cidarlamayın!
Doğmaya, tanışa, bilişə dönsün, Qəhqəhəyə dönsün, gülüşə dönsün, Günəş işığında gümüşə dönsün, Qızıldan tökülsün nurunda ayın, Atlılar, atları cidarlamayın!
Göydə kişnərtilər tüstüsü qalsın, Hər köhlən tərkinə bir günəş alsın, Üfüqdən üfüqə cığırlar salsın, Uçsun üzərindən dərənin, çayın, Atlılar, atları cidarlamayın!
|
