İki min illiyin qovuşuğudur, Gör bir nələr gəlir ağlıma, Tanrım, Məndən təhvil alıb cavanlığımı, Təslim eyləyirsən oğluma, Tanrım.
Ərzi təzələyən fərman ver bizə, Dövran amansızdır, aman ver bizə, Yetər dərd verdiyin, dərman ver bizə, Dağlı ürəkləri dağlama, Tanrım.
Oğrunun kisəsi dolmaz, deyiblər, Düşməndən dost olmaz, olmaz deyiblər, Qisas qiyamətə qalmaz deyiblər, Sən də qiyamətə saxlama, Tanrım.
Bəlanın qıçları qıc olan deyil, Qismət qismətdir ki, qaçılan deyil, Öz yolum onsuz da açılan deyil, Barı söz yolumu bağlama, Tanrım.
Mirdamət Əzizəm, adım-sanım yox, Dərdimi bölməyə bir həyanım yox, Ölsəm, səndən özgə ağlayanım yox, Öldürsən, heç sən də ağlama, Tanrım. |
