Ayaz qarı haraylayıb,

Gözlətməyib qar ayazı,

Belə qara gəlməyib heç

Xocalının qara yazı.

Bu gün ad günümdür, doğum günümdür,

Şükür yaradana, neçə ki sağam,

İldə bir günüm var...ikincisini

Dünyadan köçəndə qazanacağam.

Çıxar sərin sahilinə gündüzün,

Qəlb kövrələr, zövq incələr gecələr,

Açıq qalar könüllərin qapısı,

Şeir gələr, nəğmə gələr gecələr.

Bilmək istəsən kiməm,

Buyur, qəlbimi dindir,

Məni kobudlaşdıran

Sənin zərifliyindir.

Layla dedim, qaçasan,

Qanadlanıb uçasan,

Gözlərini hər dəfə

Gözəlliyə açasan.

Qəmli dillənməsin qəlbinin neyi,

Dünyaya yenidən baxmalısan sən,

Duman tək dağlara çökməli deyil,

İlğım tək düzlərdən qalxmalısan sən.

Günlərin pozulmuş nədən düzümü,

Ey könül, bu sirrin arxasınca düş,

Oğul varlığının günəş üzünü

Ata yoxluğunun buludu örtmüş.

                               Müəllif.

Sevincə şərik çıxar,

Qəmi bölər səməni,

Təbiəti dirildər,

Özü ölər səməni.

           Müəllif