Bilmək istəsən kiməm, Buyur, qəlbimi dindir, Məni kobudlaşdıran Sənin zərifliyindir.
Ayrılmasın yolumuz, Məndən bəsinmə hədər, Gözəlliyin önündə Eybəcərəm bu qədər.
Gözünü yummursan ki, Hərdən yuxuna girəm, Kipriyinin ucunda Səfil-səfil gəzirəm.
Sən inam üzərində, Mən şübhələr içində, Belə bərqərar olduq Bu dünyanın köçündə.
Sən bir həqiqət rəmzi, Mən bir xəyal kimiyəm, Kəlamların önündə Əbədi lal kimiyəm.
Gözlərim hər kitabdan Bir sanballı söz dərir, Sənin səmimiyyətin Məni saxta göstərir.
Mənə pay göndəribdir Dərdi-qəmi Yaradan, Səni liman xəlq edib, Məni gəmi yaradan.
Sal qayasan, qarşında Dibsiz dərə kimiyəm. Sən bir tarın mizrabı, Mən də sarı simiyəm.
Canım canından canlı, Boyum boyundan hündür, Məni kiçik göstərən Sənin böyüklüyündür.
|
