Günlərin pozulmuş nədən düzümü, Ey könül, bu sirrin arxasınca düş, Oğul varlığının günəş üzünü Ata yoxluğunun buludu örtmüş. Müəllif.
Burda tort ətri var, orda aş iyi, Min il düşünsək də, duymazdıq yenə, Sənin doğum günün ev sahibliyi Edəcək atanın ölüm gününə.
O qapı qürubsa, bu qapı dandır, Ora qara bağla, bura qırmızı, Ömür təqviminə xeyli zamandır Bir gün həkk olunub, qara-qırmızı.
Varmı bu qəbildən ehtiyat günün, Bəlkə bu, Tanrıdan dərs olunubdur, Günahsız olsa da, sənin ad günün Əcəlin hökmüylə həbs olunubdur.
Təbəssüm üzdədir, qüssə dərində, Fələk dinc dayanmır, min hiylə qurur, Səni doğum günü təbriklərində Odlu sözlərin də şaxtası vurur.
Canın üzülsə də sitəm içində, Atasan, ataya mərhəmət göstər, Onun övladları dərd-qəm içində, Sənin balaların sevinmək istər.
Üzündən oxunur ürəyindəki, Səni bu təzadlar çətin isidə, Gərək sağ olasan, var olasan ki, Yaşaya atanın xatirəsi də.
Gətir göz önünə ötən günləri, Ürəyi qubarlı, beli bükülü Sənin ad gününün o vaxtdan bəri Bir gözü ağlayır, bir gözü gülür.
Dəyməsin xətrinə ulularımın, Nələr çəkdiyini duyuram, qardaş, Mənim ölüm günüm balalarımın Doğum günlərinə düşməyəydi kaş! |
