Bu gün ad günümdür, doğum günümdür, Şükür yaradana, neçə ki sağam, İldə bir günüm var...ikincisini Dünyadan köçəndə qazanacağam.
Ömür əmanətdir, biz əmanətçi, Bu yükü şərəflə daşıya bilsək, Həyat da, ölüm də Allahdan gəlir, Yaşamaq bizlikdir, yaşaya bilsək.
Haqqa yaxın olun, diqqət yetirin, Deyilən hər adi kəlməyə, dostlar, Qorxuram, şənimə səslənən tərif Tanrının xoşuna gəlməyə, dostlar.
Bir-bir sözünüzü kəsməyim günah, Köksüm dağılsa da, kiriyirəm mən, Elə bil dönmüşəm qar adamlara, Diqqət mərkəzində əriyirəm mən.
Əl bizdən, a dostlar, ətək Tanrıdan, Onun əlindədir ixtiyarımız, Dünyaya gəlmək yox, gətirmək hünər, Sağ olsun, var olsun analarımız.
Qara saçımıza dən səpə-səpə, Ömür qatarında illər ötüşür, Ad günü təbriki, hədiyyəsi də Vallah, mənə düşmür, anama düşür.
Qoy gedim, sarılım məzar daşına, Həsrətin-hicranın gözünü oyum, Mənə ad günümdə iki gül verin, Anamın məzarı üstünə qoyum.
|
