Yükləndi çiynimə bir yeni qəm də,
Bu səhər qanımda şəkər tapıldı,
Mənim böyüklükdə, mənim görkəmdə
Şəkər mərəzinə nökər tapıldı.
Bənövşə sayağı tez solub gedir,
Əriyir günəşin gözündə fağır-
Arana düşən qar məhv olub gedir,
Qarın bəxtəvəri dağlara yağır.
Qalxsana, yuxuna noğulmu yağır,
Ov, başı üstünü aldıranındır,
Tez yatıb gec duran nə bilsin axı,
Səadət gec yatıb tez duranındır.
Demirəm, dahiyəm, mütəfəkkirəm,
Xəzan yarpağıdır yolumda kədər,
Yeməyin dadını duya bilmirəm,
Sözün ləzzətini duyduğum qədər.
Dolubdur buludlar dolduğu qədər,
Sisin, dumanındır, çənindir bu dağ,
Aslanın, pələngin olduğu qədər
Sənindir bu meşə, sənindir bu dağ.
Ay ata, ay ana, nurunuz söndü,
Heç dözə bilmədik həsrətinizə,
Ölüm kağızınız orderə döndü,
Haqdan bağışlandı son mənzil sizə.
Susdurmuşuq düşməni,
Qüdrətimizsən, Vətən,
Kimsə tapdaya bilməz,
Qeyrətimizsən, Vətən.
Əgər olmasa da xoş gələcəyə
Aparan yol asan, ay ömrüm-günüm,
Səni budağından qoparan oğlan
Qoyarmı solasan, ay ömrüm-günüm?!
