Yükləndi çiynimə bir yeni qəm də, Bu səhər qanımda şəkər tapıldı, Mənim böyüklükdə, mənim görkəmdə Şəkər mərəzinə nökər tapıldı.
Qəlbimdə parlayan şəfəqlər söndü, Yenə boğazıma tıxandı qəhər, Dolanıb qanımda şəkərə döndü Ömür yollarında udduğum zəhər.
Bəxtə yazılanı silgi də silmir, Könlüm səksəkədə, canım qorxuda, Məni az yatmaqda suçlayan bilmir, Ziyandı şəkərə şirin yuxu da.
Kimə ərz eyləyim bu dərdi, dağı, Sözümü ariflər anlayar ancaq: Şairin həyatda məmur olmağı Bilirdim, nə vaxtsa şəkər dadacaq.
|
