Atıldım qoynuna imtahanların,

Əsgər şinelimi gəlmişəm geyəm,

Anamı-bacımı qoruyanların,

Ana-bacısının keşiyindəyəm.

İki min illiyin qovuşuğudur,

Gör bir nələr gəlir ağlıma, Tanrım,

Məndən təhvil alıb cavanlığımı,

Təslim eyləyirsən oğluma, Tanrım.

Fikirdən-xəyaldan gəlirəm cana,

Alanda əlimə əmək haqqımı,

Geyinmək bir yana, gəzmək bir yana,

O ki heç ödəmir yemək haqqımı.

Çapanda dördnala qaçırsa - atdı,

Dırnağından alov saçırsa - atdı,

Düşmənin üstünə uçursa - atdı,

Atdı ruhumuzun elə bir tayı,

Atlılar, atları cidarlamayın!

Yanına çağırıb məni bir axşam,

Söylədin: ay oğul dayanma gendə,

Görürsən yamanca naxoşlamışam,

Yanıma dərd bilən bir həkim göndər.

Yonmuşam evimdə qəm heykəlini,

Həsrətdən-hicrandan gözüm ac olmur,

Məndən inciyibdi anam gəlini,

Bizdə süpürgəyə ehtiyac olmur.

Qürurlu insan da heç əyilərmi,

Ölüncə şax qaldı atamın qəddi,

İsti evimizi isti kürk kimi

Elə bil əynindən çıxarıb getdi.
 

Oğlumun evini görəydim dedin,

Bu istək səsləndi son nəfəsində,

Sən mənim evimi görmək istədin,

Bəxt sənə çox gördü öz evini də.