Yox, aça bilmərəm bu məktubu mən,

Bu məktub bir sual işarəsidir,

Həsrətdən toxunub ya ilmə-ilmə,

Ya da bir vüsalın nişanəsidir.

Yurdu viranədir o duyğuların,

Bir ümid bitirməz min ahım mənim,

Gözümün yaşıyla çətin yuyula,

Çətin bağışlana günahım mənim.

Sən canın, mənimlə rastlaşma bir də,

Vallah bu gözəllik məni əridər,

Heykələ dönərəm durduğum yerdə,

Artar bu şəhərin bir heykəli də!

Ayrılıq ölümlə sərhəd deyildir,

Sənin məhəbbətin son hədd deyildir,

Sevginin gözləri toxdur dünyada,

Dünya sevənlərə möhtac deyildir,

Yaxşı ki, sevənlər çoxdur dünyada.

Həsrətin aydımı, ildimi sənin,

Çəkdiyini aləm bildimi sənin,

Bəxtin çiçəkdimi, güldümü sənin,

Daha gileylənmə öz taleyindən.

Qışda da, yazda da boy ata bilər

Mənim ürəyimdə bitən çiçəklər,

Müqəddəs duyğular oyada bilər

Mənim ürəyimdə bitən çiçəklər.

Bilmirəm xəyalmı, həqiqətmi bu,

Oyun çıxarırsan sən bilə-bilə,

Qəlbinə dolmamış sevgi duyğusu,

Eviniz dolubdur elçilər ilə.

Bir soyuq baxışdan donanada qəlbim

Gözündən od-alov götürərdim mən,

Səni səndən gizli, hamıdan gizli,

Qaldığın evəcən ötürərdim mən.