Qışda da, yazda da boy ata bilər Mənim ürəyimdə bitən çiçəklər, Müqəddəs duyğular oyada bilər Mənim ürəyimdə bitən çiçəklər.
Əsil səadəti gözləmək - hünər, Lal-dinməz sandığın duyğular dinər, Naşı əl uzatsa, tikana dönər Mənim ürəyimdə bitən çiçəklər.
Yanma bənövşəyə, bənövşə nədir, Novruz gülləri də bir əfsanədir, Bütün çüçəklərdən tez solub gedir Mənim ürəyimdə bitən çiçəklər.
Hisslərin ulusu sevgi hissidir, Qəlbimi bir körpə duyğu isidir, Ömür baharımın müjdəçisidir Mənim ürəyimdə bitən çiçəklər.
İllər gətirmirmi yaş üsdünə yaş, Anla istəyimi, ey ürəyi daş, Sənin əllərinlə diriləydi kaş Mənim ürəyimdə bitən çiçəklər.
|
