Yox, aça bilmərəm bu məktubu mən, Bu məktub bir sual işarəsidir, Həsrətdən toxunub ya ilmə-ilmə, Ya da bir vüsalın nişanəsidir.
Bu zərf mayasını sevgidən tutub, Ya nifrət bükülüb qan bələnibdir, Yüz əldən keçibdir bu adi məktub, Mənim əllərimdə sehirlənibdir.
Yoxsa salasıdır buludlar kimi Ömrümün üzünə kölgə bu məktub, Mənim taleyimin, məhəbbətimin Alın yazısıdır bəlkə bu məktub?!
Niyə eşqimizə göz dəydi, niyə Məndən əzab umdu, göz yaşı umdu, Bəlkə də adını çəkməyim deyə Mənə göndərdiyi ultimatumdu?!
Ya burdan o yana ömür-gün qışdır, Ya da həyatımın baharı budur, Bu məktub sevgiyə bir çağırışdır, Ya da bir sevginin nekroloqudur.
Yox, aça bilmərəm bu məktubu mən...
|
