Aləmə yaymışdı bu əl səsini,

Var-dövlət, cah-cəlal axtarmağıyla,

İsgəndər dünyanın beş qitəsini,

Tutmaq istəmişdi beş barmağıyla.

Qınağa görəmi iman da, din də,

Şeytanın əməli bir görəcəkdi,

Bir adam tapmadı adam içində,

Fizuli dərdini dağlara çəkdi.

Mən daha siqaret çəkməyəcəyəm,

İnciklər, küsülər azalsın bir az,

Mən daha siqaret çəkməyəcəyəm,

Dünyadan tüstülər azalsın bir az.

Göylərin min cürə möcüzəsi var,

Sən demə, bu yağış havası imiş,

Daraşdı köksümə söz-qarışqalar,

Ürəyim qarışqa yuvası imiş.

İki min illiyin qovuşuğudur,

Gör bir nələr gəlir ağlıma, Tanrım,

Məndən təhvil alıb cavanlığımı,

Təslim eyləyirsən oğluma, Tanrım.

Çapanda dördnala qaçırsa - atdı,

Dırnağından alov saçırsa - atdı,

Düşmənin üstünə uçursa - atdı,

Atdı ruhumuzun elə bir tayı,

Atlılar, atları cidarlamayın!

Yonmuşam evimdə qəm heykəlini,

Həsrətdən-hicrandan gözüm ac olmur,

Məndən inciyibdi anam gəlini,

Bizdə süpürgəyə ehtiyac olmur.

Ay bacım, könlünü ver həqiqətə,

Ellər alqış desin bu məhəbbətə,

Qovuşsun hər dəfə haqq ədalətə,

Sən ayağa qalxıb hökm oxuyanda.