Mən daha siqaret çəkməyəcəyəm, İnciklər, küsülər azalsın bir az, Mən daha siqaret çəkməyəcəyəm, Dünyadan tüstülər azalsın bir az.
Acizlik olubdur mənə göz dağı, Günah da iradə sahibindədir, Bəzən unuduram çörək almağı, Siqaret həmişə döş cibimdədir.
Mənim çəkdiyimi çəkməyən bilməz, Nəfsim heç qoydumu ürəyim dinə, Daha dilənçiyə yazığım gəlməz, Dönmüşəm siqaret dilənçisinə.
Məndən tütünçü qız, küsmə nahaqdan, Görür hər siqarda göz ölümümü, Dodağım siqara toxunan zaman, Sanki mən öpürəm öz ölümümü.
Gərək ürəyimdə daim dövr edən, Bu zərif duyğunu dilimlə deyəm: Siqara ayrılan öpüşləri də Sevgilim, mən sənə bəxş edəcəyəm.
Mən daha siqaret çəkməyəcəyəm, İnciklər, küsülər azalsın biraz, Mən daha siqaret çəkməyəcəyəm, Dünyadan tüstülər azalsın biraz.
|
