Qınağa görəmi iman da, din də, Şeytanın əməli bir görəcəkdi, Bir adam tapmadı adam içində, Fizuli dərdini dağlara çəkdi.
O vaxtdan bir sual içimdə düyün, Görəsən ən dolğun cavab hansıdı, Dünyamı əyilib, yoxsa gördüyüm Əyri güzgülərin inikasıdı?!
Həyat buqələmun, min bir donu var, Deməyə gəlmir də adamın dili, Əlsiz adamlara əl tutmayanlar Damsız adamları damlaya bilir.
Sözümün altına vərəq sərməyin, O ki yuvasını dillərdə qurdu, Hər adam bacarmır ürək verməyi, Amma dərd verməyə hamı hazırdı.
Düzü qoyubdular əyri yerinə, Müqəddəs duyğular toz dəyərində, Ünsiyyət bağlayıb biri-birinə Dost deyən kişilər tost deyir indi.
Şeytan yaxamızdan yapışıb dartır, Bəşərin taleyi gümana qalır, Dünyada ilbəil əhali artır, Dünyada günbəgün insan azalır.
|
