Ay bacım, könlünü ver həqiqətə, Ellər alqış desin bu məhəbbətə, Qovuşsun hər dəfə haqq ədalətə, Sən ayağa qalxıb hökm oxuyanda.
Meydan açılmasın hər yalan sözə, Yol vermə, amandı, qəsdi-qərəzə, Çalış pozulmasın mizan, tərəzi, Sən ayağa qalxıb hökm oxuyanda.
Ölçəndə-biçəndə unutma təki, İnsan taleyidir əllərindəki, Qanuna hörmət et, Qanundan çəkin, Sən ayağa qalxıb hökm oxuyanda.
Kimsə gizlətməsin çuvalda cida, Günəş öz əksini tapsın damcıda. Vəkil də sevinsin, ittihamçı da, Sən ayağa qalxıb hökm oxuyanda.
Haqqın çeşməsi tək çağlasın səsin, Nə könül incisin, nə qəlbə dəysin, Vətən məmnun-məmnun başını əysin, Sən ayağa qalxıb hökm oxuyanda.
Nəfəsin baharın gül nəfəsidir, Səsin Femidanın doğma səsidir, Desinlər, Ədalət ilahəsidir, Sən ayağa qalxıb hökm oxuyanda.
|
