Yenəmi süpürdün həyət-bacanı,
Nə qoçaq qızısan Azərbaycanın,
Çıx çölə-bayıra, nə görsən, xanım,
Süpür hamısını, at zibilliyə.
Mən ömür sürürəm əlimdə qamçı,
Günah da mənimdir, savab da mənim,
Gah vəkil oluram, gah ittihamçı,
Sual da mənimdi, cavab da mənim.
Əməli başında çatlasın gərək,
Cızığından çıxır, yolunu azır,
Hava tutulandan açılanadək
Kölgəm ayağımın altını qazır.
Yetər, ibarəli danışma barı,
Çoxdur sən bilməyən peşə dünyada,
Mənim misralarım güllə qatarı,
Nadan ovçusuyam meşə dünyada.
Gəzməyə çıxmısan, yoxsa ki seyrə,
Səndən soruşuram, cavab ver görək,
Şəhidlər uyuyan müqəddəs yerə-
Sən bu xiyabana niyə gəlmisən?
Ay mənim dünyaya gəlməmiş oğlum,
Ay mənim dünyaya gəlməmiş qızım,
Siz Allah, deməyin çaşıbdır ağlım,
İstəyirəm sizə bir məktub yazım.
Siz mənə susmağı görməyin rəva,
Hər şerim bir dünya səyahətimdir,
Mənim kitabımı açmağa nə var,
Mənim kitabımı örtmək çətindir.
Niyə bəxtimizlə yola getmirik,
Niyə taleyimiz kəc olmalıdır,
Niyə gic yerinə qoyulmalıyıq,
Niyə düşmənimiz bic olmalıdır?!
