Yetər, ibarəli danışma barı, Çoxdur sən bilməyən peşə dünyada, Mənim misralarım güllə qatarı, Nadan ovçusuyam meşə dünyada.
Qurtula bilməzsən söz tilsimimdən, Ağzımın kəsəri dərs olmalıdır, Dünyada haqq sözün sarı simindən, Hələ çox nadanlar asılmalıdır.
Əzəldən haqq sözə gətirdim iman, Neştərdən itidir haqq sözün tili, Malbaşın ağzında olduğu zaman Xaşa da yaramır öküzün dili.
Dünyanın odundan buzu inciyir, Bir əli gedənin bir əli gəlir, İndi çoxlarının quzu dincliyi Qoyun kütlüyündən irəli gəlir.
Yer-göy arasında yanan körpüyəm, Sönmərəm düşsəm də dənizə, çaya, Mən adam deyiləm, kibrit çöpüyəm, Fələk alışdırıb, atıb dünyaya.
|
