SÜPÜRGƏÇİ QIZ
Yenəmi süpürdün həyət-bacanı, Nə qoçaq qızısan Azərbaycanın, Çıx çölə-bayıra, nə görsən, xanım, Süpür hamısını, at zibilliyə.
Gəlimli-gedimli yolları süpür, Güllükdən boylanan kolları süpür, Manatı zorlayan dolları süpür, Süpür hamısını, at zibilliyə.
Qazanlar qaynaya-qaynaya getsin, Yengələr oynaya-oynaya getsin, Demə bu gedənlər ay niyə getsin, Süpür hamısını, at zibilliyə.
Vərəm budkaların, çər dükanların, Kündə kəsənlərin, zər tutanların, Sələm əlcəyiylə əl tutanların Süpür hamısını, at zibilliyə.
Kölgəsindən qorxan ağciyərlərin, Milli bəlaların, faciələrin, Erkəkli-dişili fahişələrin Süpür hamısını, at zibilliyə.
Baxma qarasına, baxma ağına, Baxma mərəzinə, cantarağına, Rastına çıxanı qat qabağına Süpür hamısını, at zibilliyə.
İtələ naqqalı boş dopu kimi, Diyirlət yaltağı əl topu kimi, Qarın ağrısının mikrobu kimi Süpür hamısını, at zibilliyə.
Süpür deyərəmmi heç nəbiləri, Yurdu Nəbilərsiz heç nə bilərik, Gözün su içməyən əcnəbilərin Süpür hamısını, at zibilliyə.
"Zibilə çıxartdın eli" desələr, "Əsdirdin cəhənnəm yeli" desələr, Çəkinmə adina "dəli" desələr, Süpür hamısını, at zibilliyə, Süpür hamısını, at zibilliyə! |
