Ay mənim dünyaya gəlməmiş oğlum, Ay mənim dünyaya gəlməmiş qızım, Siz Allah, deməyin çaşıbdır ağlım, İstəyirəm sizə bir məktub yazım.
Ay bala, şəhərin hər qarışında Qızlar atanızı yaxıbdır oda, Sizin ananızın axtarışında Az qalıb unudam öz anamı da.
Subay dolanardım, qadası, gəl ki, Sevgisiz üşüdü sinəmdə ürək, Bir gözəl sevirəm, elə gözəl ki, O məni sizinlə görüşdürəcək.
Dünyanın malından gözlərim toxdur, Mənim də ömrümdən qalacaq bir iz, Nə olsun şerimdə yenilik yoxdur, Siz mənim həyatda yeniliyimsiz.
Balası, qəlbimdə bir istək yatır, Gör neçə payızdır, gör neçə yaydı, Çalışdım vuruşdum igid olmadım, Barı bir igidə ata olaydım.
Gülməli gəlsə də sizə bu yazım, Elə bilməyin ki, çaşıbdır ağlım, Ay mənim dünyaya gəlməmiş qızım, Ay mənim dünyaya gəlməmiş oğlum! |
