Göz ürəyin aynası, ürəkləri gəz, dolan,

Hər qəlbin öz döngəsi, öz dalanı var axı,

Mənim başqadır peşəm, mən münəccim deyiləm,

Amma yaxşı bilirəm, hansı göz hardan baxır.

O gün ki qələmdən çəkildi əlim,

Şeiriyyət mələyi "yaz" dedi mənə,

Yanımdan salamsız ötdü sevgilim,

Gözünün gileyi "yaz" dedi mənə!

Elə qarışıb ki, dünyanın işi,

Qorxaq da özünü qoçaq sanıbdı,

Üzün qara olsun a toyuq kişi,

Arvadın nə yaman xoruzlanıbdı.

Boyum qarış-qarış qalxardı hər il,

Sanki İlahidən ərməğandı bu,

Görənlər deyərdi, boy-buxun deyil,

Başın dırmaşdığı nərdivandı bu.

Gülsüm kasıb qonşumuzun qızıydı,

Unutmuşdu sevinməyin dadını,

Gözü qara, saçı uzun qızıydı,

Neçə yerdən çəkmişdilər adını.

Əzəldən astarı xeyirdi şərin,

Əgər sanırsansa sözümü nahaq,

Sağkən ayaqaltı edilənlərin

Ölüb, çiyinlərə qalxmağına bax!

Hara gedirdiniz, qızlar, a qızlar,

Yolunuz yuxumdan keçdi bu gecə,

Siz gəlib yuxuma girməsəydiniz,

Elə deyərdim ki, heçdi bu gecə.

Həsrətin yolunu sevgiylə kəsdin,

Günlərin qayğısız ötüşdümü heç,

Xəstəydim, nanə tək üstümdə əsdin,

Sənə sağlığımdan pay düşdümü heç?!