O gün ki qələmdən çəkildi əlim, Şeiriyyət mələyi "yaz" dedi mənə, Yanımdan salamsız ötdü sevgilim, Gözünün gileyi "yaz" dedi mənə!
Masmavi səmalar uddu qəlbimi, Alovlu qəlbimi, odlu qəlbimi, Tanrı işığına tutdu qəlbimi, Qiblənin küləyi "yaz" dedi mənə!
İmana söykənib, dinə arxalan, Daim arxalandın, yenə arxalan, Mən varam,-söylədi,-mənə arxalan, Tarixin ələyi "yaz" dedi mənə!
Düzün düz eşqi var, dağın dağ eşqi, Min zərrə yaşadar bir çıraq eşqi, Duyan könüllərin yaratmaq eşqi, Arzusu, diləyi "yaz" dedi mənə!
Zaman gözlərini gözümə dikdi, Gördüm baxışları çilik-çilikdi, Şairə yazmamaq fərarilikdi, Vətənin taleyi "yaz" dedi mənə!
|
