Boyum qarış-qarış qalxardı hər il, Sanki İlahidən ərməğandı bu, Görənlər deyərdi, boy-buxun deyil, Başın dırmaşdığı nərdivandı bu.
Müəllim aralı, lövhə uzaqda, Günah boyumdaydı, bundan halıydım, Sinifdə hamıdan öndə olsamda, Hamıdan arxada oturmalıydım.
Bəzisi ayıqdı, bəzisi oyuq, Bəzi uşaqlar da saxtakardılar, Çiynimə çatmazdı çoxunun boyu, Ağlı topuğumda axtarardılar.
Gah sağa dönərdik, gahda ki sola, Kölgəmiz bizimlə gəzərdi sərvaxt, Təkcə mənim kölgəm sığmazdı yola, Başı daşdan-daşa dəyərdi hər vaxt!
Əbəsdir dost-düşmən qazanmağım da, Ömür ötən ömür, gün keçən günmüş, Mənim uzun-uzun uzanmağım da Bir qızın xoşuna gəlmək üçünmüş.
İndi dərdli qəlbim dönübdür neyə, Qayğı hasarıdır indi hər yanım, Hüznlü-hüznlü ucalır göyə, Boyu kölgəsinə başdaşı canım.
Kəsilən bir səsəm, boğulan bir ün, Vallah, istəməzdim həyatdan doyum, Həyəcan içində keçən ömrümün Nida işarəsi olubdu boyum.
Yazdığım hər sözü düz yazsam da mən, Hələ də ağlına batmır Tanrının, Nə qədər boy atıb, uzansam da mən, Əlim ətəyinə çatmır Tanrının.
|
