Yükləndi çiynimə bir yeni qəm də,

Bu səhər qanımda şəkər tapıldı,

Mənim böyüklükdə, mənim görkəmdə

Şəkər mərəzinə nökər tapıldı.

Ay ata, ay ana, nurunuz söndü,

Heç dözə bilmədik həsrətinizə,

Ölüm kağızınız orderə döndü,

Haqdan bağışlandı son mənzil sizə.

Heç bilmirəm, əzizim,

Bu yas kimin yasıdır,

Mənim "amin" dediyim

Məhəbbət duasıdır.

Sumqayıtda məktəblərinin birinin

buraxılış sinfində son zəngə

bir həftə qalmış insan tələfatında

səbəb olan faciə baş vermişdir.

                           Qəzetlərdən.

Məktəb basmış məzunları bağrına,

İkinci dərs... bir imtahan... bir qorxu,

Zəng vuranın gələrdimi ağlına,

Beş məzunun son zəngidir vurduğu?!

Güllərin qönçəsi şəbnəmə həsrət,

Ağaclar əl açıb yalvarır göyə,

Qatıb qabağına tozanaq kimi,

Torpağın ahını yel vurur göyə.

Nə yaman dolmusan buludlar kimi,

Gözünün yaşını tök, burax məni,

Ömründə qoyduğum xatirələrdən

Qəlbinə bir yuva tik, burax məni.

Sözümün üstündə dura bilmədim,

Səni unutmağa çatmadı gücüm,

Dünən qapınıza gəlmişdim, gülüm,

Qara bayramıma çağırmaq üçün.

Düzdə qərar tutdum düz ürəyimlə,

Sinəmi yandıran köz ürəyimlə,

Bu yola düşmədim öz ürəyimlə,

Sən mənim arxamca gəlmə, yazıqsan.