Nə yaman dolmusan buludlar kimi, Gözünün yaşını tök, burax məni, Ömründə qoyduğum xatirələrdən Qəlbinə bir yuva tik, burax məni.
Keçdiyin hər körpü bir xudafərin, Döz ki, qoy desinlər dözdü, afərin, Gözündən başlanır bu son səfərim, Gözünü gözümə dik, burax məni.
İstərəm kədərdən, qəmdən gen düşəm, Gecələr gözümə durur əndişəm, Saxta sayqılardan cana gəlmişəm, Təklik istəyirəm, tək burax məni.
Ürəyin hökmüylə bacarmaq olmur, Məhəbbət gül deyil, becərmək olmur, Sənin gözlərindən cücərmək olmur, Özgə ürəyinə ək, burax məni.
Solğun yanağında qurumuş yaşam, Çətin ki sel olam, kükrəyəm, coşam, Əzizəm, sinəndən asılmış daşam, Qəzəb sapandını çək, burax məni.
|
