Güllərin qönçəsi şəbnəmə həsrət, Ağaclar əl açıb yalvarır göyə, Qatıb qabağına tozanaq kimi, Torpağın ahını yel vurur göyə.
Həzin yağış yağır əsəblərimə, Hirsimin alovu soyumaqdadır, Mənim toz qalanmış sinirlərimi, Səmadan millənən su yumaqdadır.
Göyərmək istəyir solan duyğular, Ürəyim az qalır geyə çəkməni, Vücudlar dəyişmiş bir əski ruham, Suya çək, İlahi, suya çək məni.
...Göydən ümid kimi üzülür yağış, Bulud yaş dəsmala bənzəyir bu gün, Aşsüzən gözündən süzülür yağış, Göylər aş bişirir ehsanım üçün.
|
