Mən elə bilirdim döyüşdə səni

Yağılar vuranda əlil olmusan,

Sən demə, həyatın sərt küləkləri

Səni qovuranda əlil olmusan.

Xəzələ qərq edir yolu, səkini,

Torpağına səpir, daşına səpir-

Qızıl yarpaqları qızıl pul kimi

Payız yolçuların başına səpir.

Evin yıxılmasın, a Mirzə Cəlil,

İxtiyar qocanı etmisən zəlil,

Gəzir kənd-kəsəyi, dolaşır eli,

Məmmədhəsən əmi eşşək axtarır.

Saxla, saxla görüm bu hücumu sən,

Uşağın üstünə niyə cumursan,

Təmənna güdürsən, rüşvət umursan,

Bu qız hardan alsın sən istəyəni?!

Qovuşa ömrünün xoş anlarına,

Sirli yuxular tək yozula qızlar,

Əyləşə gəlinlik maşınlarına,

Yolların ağına düzülə qızlar-

Qaldıqca dönməyir qızıla qızlar.

Bu yol ayrıcında bir işıqfor qız

Yaman nizamlayır gediş-gəlişi,

Gözləri qamaşır piyadaların,

Bu qız bu küçənin sevgi günəşi!

Qəsd eyləyib canıma,

Qəsd eyləyib əynimə,

Bir ev də mən yüklədim

Bu dünyanın çiyninə.

Görüş dikəldəndə ayrılıq yıxdı,

Hava tək dəyişdi insanın halı,

Ömür həm görüşdü, həm ayrılıqdı,

Ömür yolu üstə gözləmə zalı.