Bu yol ayrıcında bir işıqfor qız Yaman nizamlayır gediş-gəlişi, Gözləri qamaşır piyadaların, Bu qız bu küçənin sevgi günəşi!
Bu yol ayrıcında bir işıqfor qız, Alma gözəlliyi necə göz dərir, Özünü itirmiş polis işçisi Çaşıb sağ yerinə solu göstərir.
Bu yol ayrıcında bir işıqfor qız, Üzündə qayğılar sürünür onun, Gözünün işığı kiminə yaşıl, Kiminə qırmızı görünür onun.
Bu yol ayrıcında bir işıqfor qız, Demirəm hamını yolundan edir, Bu qıza çatanda yol ötənlərin Kimisi dayanır, kimisi gedir.
Bu yol ayrıcında bir işıqfor qız Hansı bəxtəvərin ömrünə paydı, Burdan etinasız ötənlər evli, Ayaq saxlayanlar hələ subaydı.
|
