Qovuşa ömrünün xoş anlarına, Sirli yuxular tək yozula qızlar, Əyləşə gəlinlik maşınlarına, Yolların ağına düzülə qızlar- Qaldıqca dönməyir qızıla qızlar.
Aranda qış günü, yaylaqda yayda, Ömrü keçirəsən mağarda, toyda, Qızıl yatırdasa, ondan nə fayda, Hərəsi bir bəxtə yazıla qızlar- Qaldıqca dönməyir qızıla qızlar.
Mürgülü gözəlin bəxti də yatar, Saysan, hər Əsliyə bir Kərəm çatar, Sevgi hər ürəkdə bir ocaq çatar, Yetər od-alovu yüz ilə, qızlar- Qaldıqca dönməyir qızıla qızlar.
Elə bax, özünü itirsin oğlan, Qəlbində məhəbbət bitirsin oğlan, Səni gizli-gizli ötürsün oğlan, Baxsınlar üzülə-üzülə qızlar- Qaldıqca dönməyir qızıla qızlar.
Toy günü nə kövrək əhvaldasınız, Səadət adlanan bir yoldasınız, Hərəniz bir saray ucaldasınız, Eşqiniz çevrilə özülə, qızlar- Qaldıqca dönməyir qızıla qızlar.
Qızlar tapınmaya yalqız ömrünə, Ömrünü çevirə ulduz ömrünə, Hər toy xitam verə bir qız ömrünə, Toylardan-toylara azala qızlar- Qaldıqca dönməyir qızıla qızlar.
|
