Görüş dikəldəndə ayrılıq yıxdı, Hava tək dəyişdi insanın halı, Ömür həm görüşdü, həm ayrılıqdı, Ömür yolu üstə gözləmə zalı.
Biri hey sevinir, varlığı əsir, Başqası intizar odunda bişir, Vüsal nöqtəsiylə, həsrət nöqtəsi Gözləmə zalında üst-üstə düşür.
Yollar yönələndə gedər-gəlməzə, Gözləmə zalına dönmüşdü evlər, Hələ boylanan var hər gələn səsə, Hələ qayıtmayıb gör neçə əsgər.
Qoruya bilməsək bu həyatı biz, Anasız körpə tək kövrələr dünya, Gələnsiz, gedənsiz, yol gözləyənsiz Gözləmə zalına çevrilər dünya.
|
