Saxla, saxla görüm bu hücumu sən, Uşağın üstünə niyə cumursan, Təmənna güdürsən, rüşvət umursan, Bu qız hardan alsın sən istəyəni?!
Dərsini oxuyur, yolundan sapmır, Gündüzlər dincəlmir, gecələr yatmır, Məktəbə gəlməyə yolpulu tapmır, Bu qız hardan alsın sən istəyəni?!
Əyninə-başına baxsana dərsdə, Rəngi-ruhu solmuş quru qəfəsdi, Anası işləmir, atası xəstə, Bu qız hardan alsın sən istəyəni?!
Qəlbində dil açan diləkdən başqa, O qələm dediyi külüngdən başqa, Bu qızın nəyi var, bilikdən başqa, Bu qız hardan alsın sən istəyəni?!
Damarmı gəzirsən, zəlinin biri, Özgə cibindədir əlinin biri, Niyə düşünmürsən, dəlinin biri, Bu qız hardan alsın sən istəyəni?!
Sən, Allah deyəndən niyə demirsən, İçini pas tutub, xalis dəmirsən, Savad istəmirsən, elm istəmirsən, Bu qız hardan alsın sən istəyəni?!
Çıxart gözlərindən, çıxart çeşməyi, Nədir uşaqlara bu girişməyin, Qonşudan gəlməyib, evdə bişməyib, Bu qız hardan alsın sən istəyəni?!
Qazsa, hər kol dibi bir dolu küpmü, Hamı sənin kimi hüppülümhüpmü, Yol boyu yel əsib, qoz tökülübmü, Bu qız hardan alsın sən istəyəni?!
Tutarlı bir səbəb bula bilmirsən, Boşala bilmirsən, dola bilmirsən, Xalqa nə vermisən, ala bilmirsən, Bu qız hardan alsın sən istəyəni?! |
