Qışda da, yazda da boy ata bilər

Mənim ürəyimdə bitən çiçəklər,

Müqəddəs duyğular oyada bilər

Mənim ürəyimdə bitən çiçəklər.

Bilmirəm xəyalmı, həqiqətmi bu,

Oyun çıxarırsan sən bilə-bilə,

Qəlbinə dolmamış sevgi duyğusu,

Eviniz dolubdur elçilər ilə.

Bir soyuq baxışdan donanada qəlbim

Gözündən od-alov götürərdim mən,

Səni səndən gizli, hamıdan gizli,

Qaldığın evəcən ötürərdim mən.

Anacan, xoşbəxtəm bu səhər deyən,

Silinib üzümdən o qəm, o kədər,

Gecənin ən qatı zülmətində mən

Ağ yuxu görmüşəm səhərə qədər.

Siz mənə susmağı görməyin rəva,

Hər şerim bir dünya səyahətimdir,

Mənim kitabımı açmağa nə var,

Mənim kitabımı örtmək çətindir.

Qazana boy tutub, boylayıb gedib,

Beyrəyə toy tutub, toylayıb gedib,

Qaraca Çobanı haylayıb gedib,

Eldən ayrılmayıb elin ozanı,

Ozan yaşadacaq Azərbaycanı.

Üzümdə Tanrının nuru,

Ulu sabahdan gəlmişəm,

Canım odlana-odlana,

Keçib min ahdan gəlmişəm.

Deyirlər çoxları göz dikir yenə

Torpağına Vətən, daşına Vətən,

Qorxuram göz dəyə gözəlliyinə,

Gətir duz çevirim başına, Vətən!