Anacan, xoşbəxtəm bu səhər deyən, Silinib üzümdən o qəm, o kədər, Gecənin ən qatı zülmətində mən Ağ yuxu görmüşəm səhərə qədər.
Mənim taleyimə doğub bu günəş, Şəfəqdən don geyib bütün varlığım, Qəlbimdə alışan bu od, bu atəş, Nur səpir yoluna bəxtiyarlığın.
Bu səhər günəşin nəfəsi qızğın, Onun da öz sözü, öz hikməti var, Gözünü gözümə dikən bir qızın Hələ deyilməmiş məhəbbəti var.
Kaş arzum yetəydi zamana, vaxta, Payı bir kimsəyə az olmayaydı, Düşəydi ağ sözlər hər qara baxta, Ağ baxta qara söz yazılmayaydı!
|
