Quşlar dən axtarır, nigaranam mən,

Bəlkə tapmadılar, elə qorxuram,

Ağ kağız üstündə boz kəlmələrdən

Sərçə civiltisi gələ, qorxuram.

Mən elə bilirdim döyüşdə səni

Yağılar vuranda əlil olmusan,

Sən demə, həyatın sərt küləkləri

Səni qovuranda əlil olmusan.

Qovuşa ömrünün xoş anlarına,

Sirli yuxular tək yozula qızlar,

Əyləşə gəlinlik maşınlarına,

Yolların ağına düzülə qızlar-

Qaldıqca dönməyir qızıla qızlar.

Bu yol ayrıcında bir işıqfor qız

Yaman nizamlayır gediş-gəlişi,

Gözləri qamaşır piyadaların,

Bu qız bu küçənin sevgi günəşi!

İlişib qalmısan səhərdən bəri,

Axa da bilmirsən buludlar kimi,

De, hansı dəryadan buxarlanmısan,

Yağa da bilmirsən buludlar kimi.

Yolun işıqsa, yolun dan,

Keçər ölümdən, olumdan.

Vaxtında tutsan qolundan,

Sənindir Mirdamət Əziz.

Sən necə ətirli, təravətlisən,

Ay mənim çiçəyim, gülüm- Ağdaşım.

Dostuna, yarına sədaqətlisən,

Qonağa "gəl" deyən dilim- Ağdaşım.

Dilindən dəftərə yıxılır sözün,

Dəftəri örtürsən, yox olur sözün,

Məclisə çıxmağa sıxılır sözün,

Şeri mürəkkəbdə boğulan şair.