Ömrün zirvəsindən qanrılıb baxdım,

Andım o günləri, susub, kiridim:

Anamın əlindən yapışıb qalxdım,

Yarın əllərindən tutub yeridim.

Bənövşə sayağı tez solub gedir,

Əriyir günəşin gözündə fağır-

Arana düşən qar məhv olub gedir,

Qarın bəxtəvəri dağlara yağır.

Qalxsana, yuxuna noğulmu yağır,

Ov, başı üstünü aldıranındır,

Tez yatıb gec duran nə bilsin axı,

Səadət gec yatıb tez duranındır.

Bu gidi dünyanın faniliyini

Gərək dönə-dönə dərk eləyəsən,

Sınayıb, sınaqdan çıxarmadığın

Kimsəyə nəbadə ərk eləyəsən.

Yarımçıq yarıdan qayıdar yolu,

Araz bəhanədi, Kür bəhanədi,

Yersiz hökm eyləyər, yerli ram olar,

Güc gücə bağlıdır, yer bəhanədir.

Sağ qulağın cingildəyirsə xeyrinə danışırlar. (İnanclardan.)

Kimin qapısını kim xeyrə açar,

Oğulsan addım at, kişisən ucal,

Qeybətlə açırsa ağzını açan,

Daha cingildəməz sağ qulağımız.

Beşiyim başımda laylamı çalıb,

Əslimə qaytarar bir də saz məni,

Dost-düşmən yanında xəcil eyləməz,

Yaşadar xeyirdə, şərdə saz məni.

Daha bərkiyibdir qanadlarınız,

Uçuş məqamıdır, uçmalısınız,

Çəkib gətirmişik bu qapıyacan,

Burdan da özünüz keçməlisiniz.