Sağ qulağın cingildəyirsə xeyrinə danışırlar. (İnanclardan.)
Kimin qapısını kim xeyrə açar, Oğulsan addım at, kişisən ucal, Qeybətlə açırsa ağzını açan, Daha cingildəməz sağ qulağımız.
Hardan əxz etmişik bir belə kini, İftira uydurmaq kişilikdimi, Zəngi susdurulmuş telefon kimi, Daha cingildəməz sağ qulağımız.
Aşkarda quzuya çevrilən "yazıq", Xəlvətdə dərimi soymağa hazır, Yetən şər danışır, yetən şər yazır, Daha cingildəməz sağ qulağımız.
Böhtan başımızı kəsir, desək də, Şeytan içimizdə gəzir, desək də, Sədəqə paylayıb, nəzir desək də, Daha cingildəməz sağ qulağımız.
Dönüb dilimizdə qarışqa filə, Qara körükçüyük fitnəyə, felə, Yuyucu barmağı girsə də belə, Daha cingildəməz sağ qulağımız.
|
