Keçmir Vətən göynəyi,

Çıxmır candan sızıltı-

İpəkdəndi köynəyi,

Yağı çəkdi, sızıldı.

Bir istiqlal baharının

Təravəti ürəyində,

Qədim Odlar diyarının

Hər gülündə, çiçəyində,

Kotanında, xışındasan,

Sən vəzifə başındasan.

Güllərə qərq olur bağçası, bağı,

Zirvəsi ağarır, sübhi-sabahdır,

Gör nə müqəddəsdir vətən torpağı,

Hər şəhid məzarı bir səcdəgahdır.

Susdurmuşuq düşməni,

Qüdrətimizsən, Vətən,

Kimsə tapdaya bilməz,

Qeyrətimizsən, Vətən.

Azərbaycan dili! Sənin hər sözün

Açardır misilsiz bir xəzinəyə,

Bakı bir üzündür, Təbriz bir üzün,

Dar gəlir bu boyda yer xəzinəyə!

Yetər üstümüzə yağılar güldü,

"Yaniq Kərəmi"yə oynama, oğul,

Bu qalxan toz deyil, bu qalxan küldü,

"Yaniq Kərəmi"yə oynama, oğul!

Hər nida könlümün bir iniltisi,

Hər kəlmə gözümün bir giləsidir,

Getsən də ömürlük tərk edib bizi,

Əksin hər ürəyə çəkiləsidir.

Qazana boy tutub, boylayıb gedib,

Beyrəyə toy tutub, toylayıb gedib,

Qaraca Çobanı haylayıb gedib,

Eldən ayrılmayıb elin ozanı,

Ozan yaşadacaq Azərbaycanı.