Yetər üstümüzə yağılar güldü, "Yaniq Kərəmi"yə oynama, oğul, Bu qalxan toz deyil, bu qalxan küldü, "Yaniq Kərəmi"yə oynama, oğul!
Hanı toy havası, düyün havası, Gəlinin havası, bəyin havası, Yoxdurmu bir özgə düyün havası, "Yaniq Kərəmi"yə oynama, oğul!
Kərəmin hayını eşitmirsənmi, Əslinin vayını eşitmirsənmi, Sazın harayını eşitmirsənmi, "Yaniq Kərəmi"yə oynama, oğul!
Döndərin gülünü xara keşişin, Çəkin boğazını dara keşişin, Uyub hiyləsinə Qara keşişin, "Yaniq Kərəmi"yə oynama, oğul!
Yeriyir əlindən qəm tuta-tuta, İtirir yolunu çən tuta-tuta, Yağı qisasına dəm tuta-tuta, "Yaniq Kərəmi"yə oynama, oğul!
Fəsaddan qurtulub, fəndlərdən qaçıb, Bərələrdən keçib, bəndlərdən qaçıb, Yanan şəhərlərdən, kəndlərdən qaçıb "Yaniq Kərəmi"yə oynama, oğul! |
