Yoların möhnətlisi, Taledən qismətlisi, Aydan arı hüsnünün, Mənim tək həsrətlisi- Bizdən sizə gedən yol.
Dünyadan səni umdu, bu yol ömür yolumdur, Vüsalına açılan, Qatlanmayan yolumdur- Bizdən sizə gedən yol.
Təbəssümün payıdır, Üstümə boş qayıdır, Gündən-günə qısalan, Həsrətimin boyudur- Bizdən sizə gedən yol.
Həsrəti bir içimdi, Göz yaşlarında çimdi, Evinizə üz tutan, Ən birinci elçimdi- Bizdən sizə gedən yol.
Söksəniz də sökülməz. Mən gülməsəm, o gülməz, Səni gətirməyincə Qapınızdan çəkilməz- Bizdən sizə gedən yol. |