Sirr kimi saxlayıb sirri babalar, Dur o nağılları harayla, çağır, Bizi aldadıbdı Piri babalar, Göydən alma düşmür, göydən daş yağır.
Gözündə intizar, qəlbində qubar, Nə gündüz dincəlir, nə gecə yatır, Kolxoz tarlasını bəzəyən qızlar Kolxoz bazarında böyürtkən satır.
Libası da qara, qanı da qara, Demə insafını atmağa gedir, Hər səhər üz tutur "qara bazara", Qara taleyini satmağa gedir.
Evində, ev nədir, xarabasında Ehtiyac təpinib onu bezdirir, Sürdüyü o uşaq arabasında Satmaq istədiyi malı gəzdirir.
Gün keçib, ay ötüb, dolandıqca il, Vətənə yad olur, eli unudur- Həyatda yer tutmur yetişən nəsil, Həyətdə yer tutur, tində yer tutur.
İlahi, bu qədər ahılın, gəncin Yoxmu dolanmağa özgə əlacı, Şikəsti dilənçi, sağı dilənçi, Dünən əl tutan da bu gün əl açır.
Kotanı unudub, kəli unudub, Torpaqdan biryolluq ayrılacaqdır, İşlədən olmasa qolundan tutub, Bu millət acından qırılacaqdır.
Sirr kimi saxlayıb sirri babalar, Dur o nağılları harayla, çağır, Bizi aldadıbdı Piri babalar, Göydən alma düşmür, göydən daş yağır.
|
