Zülmün pəncəsindən qurtulmaq üçün Ölümü qənimət biləcəyəm mən, Dünyada ilk insan olacağam ki, Əcəlin üzünə güləcəyəm mən.
Ruhum sağ qalacaq, ölsə də bədən, Bəs nədir narahat könlümü didən, Axirət yükümü heç tələsmədən Rəhmətə, lənətə böləcəyəm mən.
Gedirəm başımda duman-çənimlə, Boşalan deyil ki dünya mənimlə, Ağlayan kəslərin ağ kəfənimlə Gözünün yaşını siləcəyəm mən.
Ortaq olacağam qayğılarına, Sığal çəkəcəyəm duyğularına, Məni deyənlərin yuxularına Müjdələr gətirib gələcəyəm mən.
Mirdamət, küləklər dönsə də neyə, Dostlarım qalsa da qəm yeyə-yeyə, Anam o dünyada gözləyir deyə Sevinə-sevinə öləcəyəm mən.
|
