Məqbulmu vermişəm imtahanları, Yəni doğurdanmı, mən tələbəyəm, Anacan, versənə göz aydınlığı, Ay ata, bilmirsən sən hələ bəyəm - Mən tələbəyəm?!
Ürəyim sevinclə çırpınır bu dəm, Yaxın düşə bilməz mənə kədər, qəm, Zirvəyə can atan bir alpinistəm, Çəkilsin yolumdan çən, tələbəyəm - Mən tələbəyəm!
Güvəncim, dəstəyim elimdən gəlir, Oxuyub-öyrənmək əlimdən gəlir, Ən şirin nəğmələr dilimdən gəlir, Ömrü çal-çağırlı, şən tələbəyəm - Mən tələbəyəm!
Könlüm "Yurd yerinə işıq saç" deyir, Qarnım ac olsa da, gözüm ac deyil, Xalq üçün sadəcə ehtiyac deyil, Ömür tələbiyəm, gün tələbiyəm - Mən tələbəyəm!
Sizdən nə gizlədim, belə də olur, Kəsir bilmədiyim suallar yolu, Elə kövrəlirəm, gözlərim dolur, Gah uğursuz addım, gah qələbəyəm - Mən tələbəyəm!
Hər işdə, əməldə diri olmağa, Dostların istinad yeri olmağa, Sabah beş adamın biri olmağa Aparan ən çətin mərhələdəyəm - Mən tələbəyəm!
Mən də bu yerlərin bir baharıyam, Elimin-günüm iftixarıyam, Nurlu əməllərin bayraqdarıyam, Uğurlu sabaham, xoş gələcəyəm Mən tələbəyəm, Mən tələbəyəm!
|
