Tora yönəldirsən, tora gedirəm,
Gora yönəldirsən, gora gedirəm,
Hara yönəldirsən, ora gedirəm,
Tanrım, haqq yolundan ayırma məni,
Öz parlaq yolundan ayırma məni.
De, hansı bəndənin paxırı olmur,
Hansı yaranmışın fağırı olmur,
Dalanın-döngənin axırı olmur,
Tanrım, haqq yolundan ayırma məni,
Öz parlaq yolundan ayırma məni.
Əlimdən bir kimsə inciməyibdir,
Dilimdən bir kimsə inciməyibdir,
Könlümdən bir kimsə inciməyibdir,
Tanrım, haqq yolundan ayırma məni,
Öz parlaq yolundan ayırma məni.
Zəmini quş basar, dəni tapmaram,
Yığışdır çiskini, çəni, tapmaram,
Bir ömür yol gəlib səni tapmaram,
Tanrım, haqq yolundan ayırma məni,
Öz parlaq yolundan ayırma məni.
Yaşaram bu yolun yaddaşında mən,
Hər kəsəyində mən, hər daşında mən,
O başında sənsən, bu başında mən,
Tanrım, haqq yolundan ayırma məni,
Öz parlaq yolundan ayırma məni
|
