Adlıqdaydım, çıxışlığa çatmışam,

Tanrı salır haldan-hala, gedirəm,

Torpaq üstə əriyirəm qar kimi,

Varaq üstə qala-qala gedirəm.

Şərqilər bitərdi dodaqlarımda,

Gözümüz-könlümüz onda toxuydu,

Yeri oynadardım ayaqlarımda,

Heç kimin bu boyda topu yoxuydu.

Yol verin, ölüm çəkilsin,

Rəvamı zülm çəkilsin,

Üfürün, külüm çəkilsin,

Közümü göstərin görüm.

Səhralar quru dənizi,

Dağlar- bu dənizdə gəmi,

Torpaqda da batır adam

Sularda batdığı kimi.

Dərd buğdadı, ürəyimsə qarışqa,

Bu mən, bu da taleyimdir, tanış ol,

Xəritədir alnımdakı qırışlar,

Ərzi gəzib, dolanmışam neçə yol.

(Bir məcburi köçkün hönkürürdü...)

Od vuran gərəkdir, alışam, yanam,

Yaramın qaysağı qan verir bu gün,

Ömrünü sarayda keçirən anam,

Qaçqın çadırında can verir bu gün.

Azı quru, çoxu sudu,

Dünya niyə dağılmasın,

Ərzin nimdaş çuxasıdı,

Dünya niyə dağılmasın?!

Yeri tısbağalar sırasındadı,

Başı ayağının arasındadı,

Üzünün ağlığı "pudrasındadı",

Mənim bu dünyadan gözüm su içmir.