Azı quru, çoxu sudu, Dünya niyə dağılmasın, Ərzin nimdaş çuxasıdı, Dünya niyə dağılmasın?!
Adına min nağıl dedik, Xəbis dedik, paxıl dedik, Addımbaşı "dağıl!" dedik Dünya niyə dağılmasın?!
Bəşərin qürub çağıdı, İnsan insana yağıdı, Hərə bir yandan dağıdır, Dünya niyə dağılmasın?!
Həyat inək döşü, baxın, Süd yelnini deşib axır, Biri əmir, beşi baxır, Dünya niyə dağılmasın?!
Ac ürəyin axmasıdı, Düşünmə yağ yaxmasıdı, Yetim-yesir daxmasıdı, Dünya niyə dağılmasın?!
Əziz, su tək axır zaman, Ağır gündü, ağır zaman, Yetişibsə axırzaman, Dünya niyə dağılmasın?!
|
