Gülsüm kasıb qonşumuzun qızıydı,

Unutmuşdu sevinməyin dadını,

Gözü qara, saçı uzun qızıydı,

Neçə yerdən çəkmişdilər adını.

Dünya başdan-başa al-əlvan geyir,

Dünya gözəlliyə bürünür, Allah,

Mənim dayandığım yaş zirvəsindən,

Bu qızlar nə gözəl görünür, Allah.

Heç bilmirəm, əzizim,

Bu yas kimin yasıdır,

Mənim "amin" dediyim

Məhəbbət duasıdır.

Sumqayıtda məktəblərinin birinin

buraxılış sinfində son zəngə

bir həftə qalmış insan tələfatında

səbəb olan faciə baş vermişdir.

                           Qəzetlərdən.

Məktəb basmış məzunları bağrına,

İkinci dərs... bir imtahan... bir qorxu,

Zəng vuranın gələrdimi ağlına,

Beş məzunun son zəngidir vurduğu?!

Əzəldən astarı xeyirdi şərin,

Əgər sanırsansa sözümü nahaq,

Sağkən ayaqaltı edilənlərin

Ölüb, çiyinlərə qalxmağına bax!

Haraylar, bir kimsə yetişməz dada,

Zamanın yumruğu dişini tökər,
 Qızdan ana olmaz, oğuldan ata,

Durub yetim-yetim boynunu bükər

Adam qocalanda, lap qocalanda.

Dərələr, təpələr büründü çənə,

Ahımı dağlara ötürüb gəldim,

Anamın qəbrinin ziyarətinə

Bir dəstə qızılgül götürüb gəldim.

Güllərin qönçəsi şəbnəmə həsrət,

Ağaclar əl açıb yalvarır göyə,

Qatıb qabağına tozanaq kimi,

Torpağın ahını yel vurur göyə.