Anacan, xoşbəxtəm bu səhər deyən,

Silinib üzümdən o qəm, o kədər,

Gecənin ən qatı zülmətində mən

Ağ yuxu görmüşəm səhərə qədər.

Siz mənə susmağı görməyin rəva,

Hər şerim bir dünya səyahətimdir,

Mənim kitabımı açmağa nə var,

Mənim kitabımı örtmək çətindir.

Qazana boy tutub, boylayıb gedib,

Beyrəyə toy tutub, toylayıb gedib,

Qaraca Çobanı haylayıb gedib,

Eldən ayrılmayıb elin ozanı,

Ozan yaşadacaq Azərbaycanı.

Üzümdə Tanrının nuru,

Ulu sabahdan gəlmişəm,

Canım odlana-odlana,

Keçib min ahdan gəlmişəm.

Deyirlər çoxları göz dikir yenə

Torpağına Vətən, daşına Vətən,

Qorxuram göz dəyə gözəlliyinə,

Gətir duz çevirim başına, Vətən!

Budağında qönçələri gül açan

Ömrümüzün baharıdır yurd yeri,

Gözəllərin incəliyi, saflığı,

İgidlərin vüqarıdır yurd yeri.

Ayıra bilmirdi yazla qışını,

Qatı düşməniylə can sirdaşını,

Millət itirmişdi qan yaddaşını,

Bu şəhid qanları tökülməliydi.

Niyə bəxtimizlə yola getmirik,

Niyə taleyimiz kəc olmalıdır,

Niyə gic yerinə qoyulmalıyıq,

Niyə düşmənimiz bic olmalıdır?!