Gəzməyə çıxmısan, yoxsa ki seyrə,

Səndən soruşuram, cavab ver görək,

Şəhidlər uyuyan müqəddəs yerə-

Sən bu xiyabana niyə gəlmisən?

Elimi-obamı salamat görüm,

Şikəstim olmasın, şilim olmasın,

O kəsdən çəkinim, qorxum ki barı

Dəvəsindən böyük filim olmasın.

Düşsə də gündə yüz kərə

Saca dünyanın əlindən,

Çiçəklər çəkməz əlini

Qoca dünyanın əlindən.

Sevən ürəklərə nə payız, nə yaz,

Bülbül olmayanın gülü də solmaz,

Məni inamımdan döndərmək olmaz,

Eşqimdir bağlayan inama məni.

Yeri tısbağalar sırasındadı,

Başı ayağının arasındadı,

Üzünün ağlığı "pudrasındadı",

Mənim bu dünyadan gözüm su içmir.

Sənə rast gələnə sən sevinc payla,

Sürünmə yol boyu duman-çən kimi,

Səni göndərirəm xeyir-duayla,

Ən uzaq səfərə göndərən kimi.

Yoların möhnətlisi,

Taledən qismətlisi,

Aydan arı hüsnünün,

Mənim tək həsrətlisi-

Bizdən sizə gedən yol.

Nələr etdiyini düşündünmü sən,

Çəkdiyim həsrətin budurmu barı,

Qəlbimi odunda isitməmişdən,

Ələdin başıma şaxtanı-qarı.